Maxine Carr, fyrrverandi unnusta Ians Huntley, sem í gær var dæmdur fyrir morð á Holly Wells og Jessicu Chapman, verður að líkindum látin laus úr fangelsi í maí næstkomandi. Hún er hins vegar talin munu þurfa á lögregluvernd að halda það sem eftir er ævinnar.

Carr var sýknuð af því að hafa aðstoðað Huntley vegna morðanna, en dæmd í hálft fjórða ár í fangelsi fyrir að ljúga að lögreglu í tengslum við rannsóknina á hvarfi stúlknanna tveggja.

Lögmaður Carr, Michael Hubbard, sagði á lokadegi réttarhaldsins í gær, að hennar byði ekki öfundsverð framtíð og málið allt setti svartan blett á hana.

Þar sem Carr hefur þegar setið í gæsluvarðhaldi í 16 mánuði og getur, vegna 3½ árs dómsins, sótt um reynslulausn eftir 21 mánuð, eða í maí. Lögmaður, sem sérfróður er á sviði mannréttindamála, sagði, að lögreglu bæri skylda til að veita henni vernd - jafnvel til lífstíðar - á grundvelli mannréttindaákvæða í lögum er kvæðu á um að fólk ætti rétt á slíkri vernd, ef lífi þess væri hætta búin. Gera mætti ráð fyrir að erfitt yrði fyrir hana að reyna að dyljast eða blanda sér meðal fólks undir nýju nafni.