Dönsk rannsókn sem danska krabbameinsfélagið stóð að og um 30.000 konur tóku þátt í, leiðir í ljós, að fyrir hvert glas af áfengi sem kona drekkur á dag, aukast líkurnar á að hún greinist síðar með brjóstakrabbamein, um 10%, að því er fram kemur í frétt Berlingske Tidende. Dönsk heilbrigðisyfirvöld mæla með því að konur drekki ekki meira en 14 glös af áfengi, sem samvarar 14 einföldum áfengisskömmtum, í viku hverri, en danskur vísindamaður sem fæst við rannsóknir á krabbameini, segir að þessi mörk séu of há.

„Bæði erlendar og danskar rannsóknir sýna að áfengi er sá þáttur, sem hefur mest að segja um brjóstakrabbamein,“ segir Anne Tjønneland, yfirmaður rannsókna hjá danska krabbameinsfélaginu.

Tjønneland áætlar að yfir 5% allra brjóstakrabbameinstilfella megi rekja beint til neyslu áfengis. Hún telur að heilbrigðisyfirvöld í Danmörku, eigi að lækka þau mörk sem þau ráðleggja konum að halda sig innan, hvað áfengisneyslu varðar, sem lið í baráttunni gegn brjóstakrabbameini.