Dómari við dómstól, sem á að dæma mál Saddams Husseins, fyrrum forseta Íraks, hefur verið skotinn til bana í Írak. Skotið var á dómarann utan við hús hans í Bagdad. Náinn ættingi dómarans, sem einnig starfaði við dómstólinn, lét einnig lífið. Tíu manns að minnsta kosti hafa látið lífið í sprengjuárásum í Írak í morgun og tugir hafa særst.

Dómstóllinn á að rétta í málum Saddams og helstu samverkamanna hans. Í gær lauk frumrannsókn á máli Barzans, eins af hálfbræðrum Saddams en hann er ákærður fyrir aðild að fjöldamorðum í suðurhluta Íraks árið 1982.

Dómstóllinn var settur á stofn árið 2003 en starf hans hefur tafist mjög vegna gífurlegra öryggisráðstafana sem gerðar hafa verið. Þannig hafa nöfn dómara og saksóknara ekki verið birt af ótta við að reynt verði að ráða þá af dögum.

Að minnsta kosti tíu manns hafa látið lífið og tugir særst í sjálfsmorðsárásum á varðstöðvar hermanna í Bagdad í morgun. Bíll sprakk við herstöð við Al-Muthanna flugvöllinn í borginni þar sem nýliðar í hernum höfðu stillt sér upp í röð. Þar létu að minnsta kosti 7 manns lífið og 30 særðust.

Þá létu þrír hermenn lífið og sex særðust þegar bíll sprakk við varðstöð í suðvesturhluta borgarinnar.

Á mánudag létust að minnsta kosti 118 manns í mikilli sprengingu í borginni Hilla. Var það mannskæðasta árás uppreisnarmanna í Írak frá því Saddam Hussein hrökklaðist frá völdum fyrir tveimur árum.