Karla Homolka, sem sat tólf ár í fangelsi í Kanada fyrir að taka þátt í að nauðga, pynta og myrða tvær unglingsstúlkur, var látin laus í gær. Homolka kom í gærkvöldi fram í þætti á sjónvarpsstöðinni Radio-Canada og sagðist þar iðrast gerða sinna sáran.

„Ég græt oft, ég get ekki fyrirgefið mér... Ég hugsa um það sem ég gerði og að ég verðskuldi ekki að vera hamingjusöm."

Vitað var að til stæði að láta Homolka, sem er 35 ára, lausa og biðu fréttamenn dögum saman utan við Ste-Anne-des-Plaines fangelsið norður af Montreal í von um að sjá hana ganga út í frelsið. En kanadísk fangelsismálayfirvöld komu Homolka óséðri út úr fangelsinu og sendu í gær tilkynningu um að hún væri frjáls manneskja.

Árið 1993 gerðu saksóknarar samning við Homolka um að hún vitnaði gegn Paul Bernardo, þáverandi eiginmanni sínum, gegn því að fá vægari dóm. Homolka, sem nýlega tók sér nafnið Teale í höfuðið á raðmorðingja í kvikmynd frá 1988, hélt því fram að Bernardo hefði neitt hana til að taka þátt í morðunum en síðar kom fram myndband þar sem Homolka sést stæra sig af glæpunum.

Þau Homolka og Bernardo voru sakfelld fyrir að nauðga, pynta og myrða tvær unglingsstúlkur í Ontario. Þau voru einnig fundin sek um að nauðga og myrða 15 ára gamla systur Homolkas á aðfangadag árið 1990. Bernardo var dæmdur í ævilangt fangelsi.

Homolka sætir takmörkunum á ferðafrelsi en kanadísk fangelsismálayfirvöld óttast að hún sé enn hættuleg. Hún þarf að tilkynna um ferðir sínar til lögreglu og má ekki umgangast þekkta ofbeldismenn. Margir telja þessi skilyrði þó ekki nægilega ströng.

Á meðan Homolka sat í fangelsi tók hún upp samband við Jean-Paul Gerbet, Frakka sem situr í fangelsi fyrir að myrða unnustu sína. Einnig átti hún í sambandi við konu, sem látin var laus en braut aftur af sér til að komast í fangelsið á ný og halda áfram sambandinu við Homolka.

Homolka reynir nú að fá lögregluvernd vegna morðhótana sem hún hefur fengið og einnig vill hún að dómstólar banni fjölmiðlum að eltast við sig.