Tony Blair, forsætisráðherra Bretlands, fordæmdi hryðjuverkaárásina í Lundúnum í síðustu viku í neðri deild breska þingsins í dag. Sagði hann árásina aðför að saklausum borgurum og að ekki hefðu verið neinar upplýsingar til staðar sem koma hefðu mátt í veg fyrir hryðjuverkin. Taldi hann hryðjuverkin líklega verk hóps öfgafullra múslíma.

Þá lofaði Blair rósemi landsmanna sem fóru til vinnu sinnar í dag jafnt með strætisvögnum sem neðanjarðarlestum. „Við verðum ekki sigruð með þessháttar hryðjuverkum,“ sagði Blair. „Við munum elta uppi þá sem ábyrgir eru fyrir hryðjuverkunum hvar sem þeir eru og ekki una okkur hvíldar fyrr en þeir finnast og … verða leiddir fyrir dóm.“

Talsmaður forsætisráðherrans sagði fyrr í dag að Tony Blair hefði setið með almannavarnanefnd ásamt Charles Clarke, innanríkisráðherra Bretlands, og John Reid, varnarmálaráðherra. Hann vildi hins vegar ekki tjá sig um efni fundarins að öðru leyti en því að áherslan væri lögð á að bera kennsl á þá sem létust í hryðjuverkaárásunum og finna þá sem ábyrgir eru fyrir verknaðinum.