Evrópusambandið hvatti í dag Viktor Jústsjénkó, forseta Úkraínu, til að grípa strax til aðgerða til að viðhalda stöðugleika í landinu. Forsetinn vék allri ríkisstjórn landsins frá í morgun og skipaði nýjan forsætisráðherra til bráðabirgða en að undanförnu hafa þrír háttsettir embættismenn sagt af sér og sagt ástæðuna vera að spilling þrífist í kringum forsetaembættið.

„Við vonum að hann grípi fljótt til aðgerða til að tyggja og viðhalda stöðugleika," sagði Emma Udwin, talsmaður framkvæmdastjórnar Evrópusambandsins.

„Jústsjénkó forseti vann kosningarnar á grundvelli loforða um umbætur og að uppræta spillingu og við erum þess fullviss að stjórn hans vinnur út frá þessum loforðum," sagði Udwin.

Evrópusambandið hefur að undanförnu styrkt tengsl sín við Úkraínu en Jústsjenkó komst til valda í byrjun ársins á grundvelli stefnuskrár þar sem gert var ráð fyrir aukinni samvinnu við Vesturlönd.

„Við treystum því að þetta innanríkismál muni ekki trufla hina nánu samvinnu sem við njótum við Úkraínu," sagði Udwin.