Charles Clarke. Reuters

Þetta kom fram þegar Clarke sat fyrir svörum þverpólitískrar nefndar um innanríkismál. Þar kom meðal annars fram að ráðherrann hefði samþykkt að hafa breska ríkisborgara undir ströngu eftirliti, sem getur meðal annars falið í sér stofufangelsi og annars konar takmarkanir á frelsi. Viðkomandi einstaklingur og níu aðrir menn sem sætt höfðu þessu eftirliti eru hins vegar lausir undan því. Nú eru þrír einstaklingar, sem grunaðir eru um aðild að hryðjuverkum, undir eftirliti af þessu tagi, að því er fram kemur á vef BBC.

Þingmannanefndin, sem gerði hlé á sumarleyfi vegna fundarins um hryðjuverkamál, mun einnig varpa fram spurningum til Ian Blair, yfirmanns Lundúnalögreglunnar. Verður Blair beðinn um að svara spurningum um þá stefnu lögreglunnar að „skjóta til að drepa“ þegar um grunaða sjálfsmorðssprengjumenn ræðir.

John Denham, formaður nefndarinnar, lagði áherslu á að þingmennirnir myndu ekki spyrja ítarlega um sprengjutilræði í Lundúnum 7. júlí og um tilraun til hryðjuverka í borginni 21. júlí síðastliðinn. Nefndin myndi ekki heldur spyrja ítarlega spurninga um mál brasilísks rafvirkja, sem skotinn var til bana af lögreglu á lestarstöð í Lundúnum, 22. júlí, vegna gruns um að hann væri hryðjuverkamaður. Sagði Denham að bæði málin væru enn fyrir dómi.