Dómar í New York vísaði máli Johns A. Gotti yngri frá rétti í dag. Gotti er sonur glæpaforingjans Johns Gottis, höfuðpaurs Gambino glæpasamtakanna, sem um tíma voru talin hættulegustu samtök sinnar tegundar í borginni og með náin tengsl við ítölsku mafíuna. Gotti yngri var m.a. gefið að sök að hafa lagt á ráðin að ræna stofnanda Guardian Angels.

Réttarhöld yfir Gotti hafa staðið yfir síðan í ágúst síðastliðnum. Kviðdómur í málinu fékk átta daga til að komast að niðurstöðu í málinu. Í dag greindi kviðdómurinn hins vegar frá því að mál Gottis væri of viðamikið og gæti hann ekki komist að niðurstöðu. Var það ástæða þess að dómari vísaði málinu frá.

Málið yfir syni glæpaforingjans var margbrotið en auk þess að vera gefið að sök að hafa lagt á ráðin að ræna Curtis Silwa, útvarpsmanni og stofnanda Guardian Angels, var hann talinn sekur um ýmis konar tryggingasvik.

Bandaríska alríkislögreglan fylgdist lengi með föður Gottis, John Gotti eldri. Gotti komst hins vegar oftsinnis undan armi réttvísinnar enda var hann lengi talinn hafa mútað lögreglumönnum og dómurum. Hann var handtekinn árið 1990 og dæmdur í lífstíðar fangelsi tveimur árum síðar fyrir 13 brot, þar á meðal morð, okurlánastarfsemi, skattsvik og fleira. Gotti lést af völdum krabbameins í hálsi árið 2002.