Hætta varð við flugtak farþegaþotu bandaríska flugfélagsins American Airways á Logan-flugvelli við Boston á þriðjudaginn þegar annarri flugvél var ekið inn á brautina sem ætluð var til flugtaksins, að því er bandaríska loftferðaeftirlitið (FAA) greindi frá. Var þetta í annað sinn á viku sem svona atvik verður á vellinum.

Atvikið er nú til rannsóknar hjá FAA og beinist rannsóknin að því hvort flugumferðarstjórar eða áhöfn þotu American Eagle, sem var nýlent er henni var ekið í veg fyrir þotu American Airlines sem komin var í flugtaksstöðu, hafi átt sök á því. Blaðið Boston Globe hefur eftir heimildamanni sem kunnugur er málinu að um 300 metrar hafi verið á milli vélanna.

Þetta er í 16. sinn sem flugatvik verður á Logan-velli síðan í október í fyrra. Rannsakendur segjast ekki hafa fundið nein tengsl á milli allra þessara atvika, en segja að þröngar brautir á vellinum séu ein ástæða þess að þar eru flugatvik tíð.

Alvarlegasta atvikið varð 9. júní þegar Airbus 330 frá írska félaginu Aer Lingus og Boeing 737 á vegum US Airways, með samtals 381 mann innanborðs, voru rúmum 50 metrum og fáeinum sekúndum frá því að rekast á þegar báðar voru í flugtaki. FAA komst að þeirri niðurstöðu að tveir flugumferðarstjórar hafi átt sök á atvikinu og var báðum vikið frá störfum og sendir í endurhæfingu.

Rannsóknir á flestum öðrum atvikum á vellinum hafa leitt til þeirrar niðurstöðu að ekki hafi verið mikil hætta á að slys yrði.