Um eitt hundrað þúsund manns tóku þátt í fjöldagöngu í Hong Kong í dag og kröfðust fulls lýðræðis líkt og lofað hafi verið þegar Bretar fólu Kínverjum borgina í hendur fyrir átta árum. Eru þetta fjölmennustu mótmælaaðgerðir sem fram hafa farið í borginni síðan núverandi borgarstjóri, Donald Tsang, sem skipaður var af stjórnvöldum í Peking, tók við í júní.

Fremst í göngunni var borinn stór svartur borði með mynd af fuglabúri, sem táknmynd stjórnmálahaftanna sem mótmælendum þykir þeir búa við í borginni.

Mótmælendurnir eru ósáttir við tillögur Tsangs um lýðræðisumbætur og segja þær ekki ganga nógu langt. Samkvæmt þeim myndi nefndin sem kýs borgarstjóra, er nú er skipuð 800 mönnum sem hallir eru undir stjórnvöld í Peking, verða stækkuð um helming, og borgarráðið, sem í eru sextíu manns, yrði einnig stækkað.

Mótmælendur segja að verði þessar tillögur að veruleika þýði það í rauninni skref aftur á bak miðað við ákvæði stjórnarskrár Hong Kong, sem kveði á um fullt lýðræði.