15 sjóliðar létust og 15 særðust er bílalest þeirra var sprengd í loft upp í Mannarhéraði í norðvesturhluta Sri Lanka. Talið er að Tamíl tígrar standi á bak við árásina. Varnarmálaráðuneytið sagði að uppreisnarherinn hótaði frekari árásum. Þetta er mesta mannfall síðan samið var um vopnahlé með milligöngu Norðmanna í febrúar 2002.

Tvær rútur með sjóliða og hermenn voru sprengdar, trúlegast með jarðsprengjum og sprengjuvörpum. Árásin kemur í kjölfarið á tilkynningu frá pólitískum fulltrúa Tamíl tígranna, S. P. Thamilselvan, sem varaði við frekari árásum ef eftirlitsmenn með vopnahléinu gættu ekki þess að Tamílar kæmust örugglega um ákveðnar sjóleiðir í héraðinu. Fyrir skömmu dóu þrír sjóliðar í sjóhernum í sjóbardaga við Tamíl tígra á þessum sömu slóðum.

Fimmtíu og sjö manns hafa dáið það sem af er desembermánuði í átökum ríkisstjórnarinnar og Tamíla og hafa menn áhyggjur af því að vopnahléið gæti runnið út í sandinn og landið logað í borgarastyrjöld á nýjan leik.

Mahinda Rajapakse forseti Sri Lanka ítrekaði síðast liðinn miðvikudag að hann væri reiðubúinn til að ræða við fulltrúa Tamíla hvar sem er í Asíu um leið og þeir kærðu sig um. Japan hefur boðist til að halda viðræðurnar en Tamílar hafa farið fram á að viðræðurnar yrðu haldnar í Ósló – En þann stað kærir ríkisstjórnin sig ekki um.

Bandaríkin, Evrópusambandið, Japan og Noregur hafa öll hvatt Tamíla til að stöðva þessa nýjustu ofbeldisöldu. Löndin hafa lofað billjónum dollara til uppbyggingar efnahagslífsins sem er í lamasessi eftir þriggja áratuga blóðsúthellingu. Talið er að 60 þúsund manns hafi látið lífið í átökunum.