Bresk táningastúlka, sem komst lífs af eftir að sex menn námu hana á brott, nauðguðu og skutu í höfuðið, vitnaði gegn mönnunum í réttarhöldum yfir þeim í Reading í Bretlandi í dag. Þeim er gefið að sök, auk þess að misþyrma stúlkunni með grófum hætti, að myrða vinkonu hennar.

Saksóknarar í málinu segja það kraftaverki líkast að stúlkan hafi komist lífs af.

Mennirnir rændu stúlkunni og vinkonu hennar í Reading, pyntuðu þær og nauðguðu í lystigarði í Reading. Að ódæðinu loknu myrtu þeir vinkonu stúlkunnar og skutu hana sjálfa í höfuðið.

Stúlkan þykir hafa sýnt mikið hugrekki við réttarhöldin yfir mönnunum, en hún nýtti sér ekki þann möguleika að bera vitni á bak við tjald eins og vitnum er gefinn kostur á að gera.

Sagði stúlkan mennina hafa troðið þeim vinkonunum í farangursrými bifreiðar og ekið þeim á brott. „Ég sagði (Mary-Ann) að hætta að gráta vegna þess að ég var viss um að það var einmitt það sem þeir vildu,“ sagði hún og benti á að hún hefði haldið ró sinni á meðan öllu þessu stóð í þeirri von að vinkona hennar myndi róast.

Ekki kemur fram í fréttum breska æsifréttablaðsins The Sun hvenær ódæðið átti sér stað.