Öryggis- og samvinnustofnun Evrópu, ÖSE, tilkynnti í morgun að þingkosningarnar, sem haldnar voru í Úkraínu í gær hefðu uppfyllt alþjóðlegar lýðræðislegar kröfur. Þá hefur forseti Úkraínu, Viktor Jústsjenkó, beðið forsætisráðherra landsins að hefja stjórnarmyndunarviðræður eftir þingkosningarnar sem fram fóru nú um helgina, en hátt settur embættismaður greindi frá þessu í dag.

„Forsetinn hefur hitt forsætisráðherrann, Júrí Jekanúrov, og sagt honum að hefja ráðaleitun varðandi myndun samsteypustjórnar á þinginu,“ sagði Ívan Vasíuník, starfsmannastjóri forsetans.

Flokkur Jústsjenkó beið afhroð í kosningunum um helgina en hann lenti í þriðja sæti. Forsetans bíður nú það erfiða verkefni að sameinast með einum sínum helsta pólitíska andstæðingi.

Meðal þeirra er Viktor Janúkóvítsj, en hann er fyrrum forsætisráðherra landsins sem þurfti að stíga af valdastóli eftir Appelsínugulu byltinguna síðla árs 2004, eða Júlíu Tímósjenkó sem Jústsjenkó rak úr embætti forsætisráðherra fyrir hálfu ári síðan.

Það skiptir engum toga hverjum Jústsjenkó þarf að sameinast því ljóst þykir að þetta eigi eftir að vera mikil pólitísk áhætta fyrir forsetann. Hann hefur heitið því að Úkraína myndi hefja aðildarviðræður við Evrópusambandið og Norður Atlantshafsbandalagið (NATO).

Með því að sameinast Janúkóvitsj mun allt það ferli sem miðar að því að færa Úkraínu nær Vesturveldunum líklega hægjast mjög mikið, en Janúkóvitsj er hlynntur stjórnvöldum í Rússlandi.

En sú hætta er fyrir hendi að það muni fæla fjárfesta frá ef forsetinn mun hefja samstarf með Tímósjenkó á nýjan leik. Fjárfestarnir eru á varðbergi gagnvart íhlutunaraðferðum hennar og gallharðri afstöðu hennar gagnvart þjóðnýtingu á auðlindum.