Hart deilt um ólöglega innflytjendur í Bandaríkjunum
Bush forseti notaði nýlega tækifærið við athöfn þar sem tugir nýrra ríkisborgarara sóru í Hvíta húsinu eið að stjórnarskránni og sagði að innflytjendur hefðu auðgað Bandaríkin og þjóðin fagnaði þeim. Samfélagið vildi fremur ýta undir innflutning en amast við honum.
Bush vill að að margir ólöglegir innflytjendur fái tímabundið landvistar- og atvinnuleyfi og jafnframt að þeir geti á endanum, ef þeir standist kröfur, fengið ríkisborgararétt. Dómsmálanefnd öldungadeildarinnar samþykkti á mánudag með 12 atkvæðum gegn sex tillögu um fyrirkomulag þar sem ólöglegir innflytjendur gætu orðið vinnugestir (e. guestworkers). Geta þá ólöglegir innflytjendur greitt sekt og, að því tilskildu að þeir séu með hreint sakavottorð, sótt um leyfi til að dvelja og starfa í landinu í þrjú ár. Fjórir repúblikanar og átta demókratar studdu tillöguna, andstæðingarnir voru allir repúblikanar.
Innflytjendur mótmæla
Málið er mikið hitamál vestra og um síðustu helgi efndu stuðningsmenn ólöglegra innflytjenda, sem langflestir eru frá Mexíkó og fleiri ríkjum Rómönsku Ameríku, til fjöldafunda gegn frumvarpinu. Alls eru um 14% Bandaríkjamanna, um 40 milljónir manna, frá löndum Rómönsku Ameríku og ljóst að þeir geta haft mikil áhrif í kosningum, einkum í suðvestanverðu landinu þar sem þeir eru flestir. Kosið verður um öll sætin í fulltrúadeild þingsins, þriðjung sæta í öldungadeildinni og mörg ríkisstjóraembætti í haust.Hins vegar eru margir Bandaríkjamenn mjög ósáttir við að fólk geti dvalið með ólöglegum hætti í landinu og jafnvel notið ýmissa réttinda. Fulltrúadeildin samþykkti í desember frumvarp sem kveður á um að ólöglegir innflytjendur skuli vera taldir glæpamenn. Einnig að vinnuveitendur þeirra skuli greiða háar sektir komist upp um athæfið.
Í tillögunni er kveðið á um skyldu vinnuveitenda til að hafa samband við heimavarnaráðuneytið og ganga úr skugga um að útlendingar sem þeir ráða hafi tilskilin leyfi, séu ekki ólöglegir í landinu. Einnig að sektir sem þeir greiða sem laumast inn í Bandaríkin verði hækkaðar og refsingar til handa þeim sem koma aftur inn í landið eftir að hafa verið vísað burt verði þyngdar.
Afstaða Bush ekki vinsæl meðal repúblikana
Innflytjendamálin voru efst á baugi á leiðtogafundi þeirra Bush, Vicente Fox, forseta Mexíkó, og Stephens Harper, forsætisráðherra Kanada, í Cancun á föstudag en um mikið hagsmunamál er að ræða fyrir Mexíkó-menn, eins og gefur að skilja, í ljósi þess hversu mikill straumur fólks er þaðan og til Bandaríkjanna. En áætlað er að af ólöglegum innflytjendum í Bandaríkjunum séu um sex milljónir frá Mexíkó.Bush ítrekaði á fundinum þann vilja sinn, að innflytjendum verði gert kleift að fá landvistar- og atvinnuleyfi í Bandaríkjunum. Virtust þeir Fox vera á einu máli um að mikilvægt væri að fyrirbyggja, að Bandaríkjaþing samþykkti endanlega frá sér innflytjendalög í líkingu við þau sem fulltrúadeildin samþykkti í desember.
Með afstöðu sinni er Bush hins vegar að stuðla að klofningi í Repúblikanaflokknum á kosningaári, en sem fyrr segir skiptast menn þar mjög í tvö horn hvað þessa hluti varðar: aðilar í viðskiptalífinu vilja gjarnan hafa aðgang að ódýru vinnuafli, á meðan aðrir repúblikanar vilja taka upp harðari stefnu gagnvart ólöglegum innflytjendum.
Málið hefur verið til umræðu í öldungadeild Bandaríkjaþings í vikunni en nokkrir repúblikanar úr fulltrúadeildinni fóru á fimmtudag afar hörðum orðum um það frumvarp, sem dómsmálanefndin slagði blessun sína yfir á mánudag. Og Bush forseti var ekki undanskilinn gagnrýni þeirra. "Hann hefur engar áhyggjur af því að fá kjósendur upp á móti sér, hann þarf ekki að berjast aftur fyrir endurkjöri," sagði Tom Tancredo, fulltrúadeildarþingmaður frá Colorado, sem einna helst hefur beitt sér í málinu. "Ég vildi óska að hann hugsaði meira um hagsmuni flokksins síns og ég vildi auðvitað líka óska þess að hann hugsaði meira um hagsmuni lands og þjóðar."
