Hjón í Missouri í Bandaríkjunum sviku fé út úr hjálpsömum nábúum sínum með upploginni sögu um að konan hefði eignast sexbura. Sagði fólkið að börnin lægju á gjörgæsludeild nálægs sjúkrahúss og það lýsti einnig fjálglega fjárhagserfiðleikum vegna þess hve læknishjálpin væri dýr. Hafin var söfnun fyrir fjölskylduna á netinu, en í gær kom hið sanna í ljós og lögreglan undirbýr nú ákærur.

„Ég hef aldrei lent í öðru eins," sagði Aaron Ambrose, lögreglustjóri í Grain Valley.

Þau Sarah og Kris Everson sögðust hafa eignast sexbura, fjóra drengi og 2 stúlkur, þann 8. mars og börnin lægju á gjörgæsludeild á sjúkrahúsi. Á mánudag birtist frétt í blaði í Missouri með mynd af hjónunum þar sem þau héldu á sex barnagöllum og sögðu frá fæðingunni. Í viðtalinu lýstu þau fjárhagserfiðleikum og strax á mánudag hófu góðhjartaðir aðilar að undirbúa fjársöfnun á netinu. Gefin voru loforð um að gefa hjónunum bíl, þvottavél og þurrkara, reiðufé og gjafabréf. Fasteignasala sagðist ætla að útvega þeim nýtt heimili.

Sarah Everson sýndi fréttamanni AP myndir af sér í óléttufötum og jafnvel sónarmyndir sem hún sagði vera af sexburunum. Hún sýndi fréttamanninum barnaherbergi, sem beið komu barnanna og skúffur fullar af barnafötum.

Hún sagði einnig, að þau hefðu ekki sagt frá sexburunum fyrr vegna þess maður í fjölskyldu eiginmannsins vildi myrða þau og börnin.

„Ég er svo hrædd um að þau lifi þetta ekki af," sagði konan grátandi. „Það skilur enginn hvað þetta er erfitt."

Lögregla yfirheyrði Everson-hjónin í gær, þegar í ljós kom að ekkert sjúkrahús í nágrenninu kannaðist við sexburafæðingu. Hjónin viðurkenndu síðan í gærkvöldi að þau hefðu logið upp sögunni í þeim tilgangi að fá fjárframlög frá almenningi.

Söfnunarsíðan var fjarlægð af netinu í gærkvöldi.