Tveir vopnaðir og hettuklæddir menn rændu verkunum úr Munch-safninu í Ósló þann 22. ágúst 2004 í viðurvist fjölmargra starfsmanna og ferðamanna. Þeir flúðu þvínæst af vettvangi á stolnum bíl, sem ekið var af félaga þeirra.

Alls voru sex manns ákærðir fyrir aðild að ráninu en þrír voru sýknaðir í dag. Héraðsdómur í Ósló taldi sannað, að Bjørn Hoen hefði tekið þátt í að skipuleggja ránið og var hann dæmdur í 7 ára fangelsi. Þá var talið sannað að Petter Tharaldsen hefði ekið flóttabílnum en hann var dæmdur í 8 ára fangelsi. Þeir tveir voru einnig dæmdir til að greiða Óslóborg 750 milljónir norskra króna, jafnvirði 9 milljarða íslenskra króna, í bætur fyrir málverkin, sem enn eru ófundin.

Þá var Petter Rosenvinge dæmdur í 4 ára fangelsi fyrir að útvega bílinn en hann hélt því fram að hann hefði ekki vitað að nota ætti hann við rán.

Þrír hinna ákærðu voru hins vegar sýknaðir, þar á meðal Stian Skjold, sem lögregla taldi að hefði farið inn í Munch-safnið og tekið málverkin tvö af veggjunum. Thomas Nataas var einnig sýknaður en hann var ákærður fyrir að hafa haft málverkin í sinni vörslu eftir ránið. Sá þriðji, sem var sýknaður, var grunaður um að hafa tekið þátt í skipulagningunni.

Málverkunum var dænt úr Munch-safninu á Tøyen í Ósló. Tveir grímuklæddir menn ruddust inn í safnið og neyddu verði og gesti til að leggjast á gólfið. Annar ræninginn var vopnaður skammbyssu. Mennirnir klipptu strengi, sem málverkin tvö voru fest með og hlupu síðan með þau út. Fyrir utan safnið beið þriðji maðurinn í Audi skutbíl og ræningjarnir óku á brott. Bíllinn fannst skömmu síðar á öðrum stað í Ósló og hafði þá verið kveikt í honum.

Margt bendir til þess að myndirnar hafi skemmst í meðförum ræningjanna. Vitni, sem sá til ræningjanna, sagði að þeir hefðu sparkað í verkin til að fjarlægja rammana. Þá lágu málverkin um tíma í sendibíl.

Málverkanna er enn saknað og hafa yfirvöld í Noregi boðið 20 milljónir íslenskra króna hverjum þeim sem getur gefið upplýsingar um hvar þau sé að finna.

Málverkið Madonna eftir Munch.