Frakkinn Zacarias Moussaoui var í dag formlega dæmdur í ævilangt fangelsi fyrir sinn þátt í árásunum á Bandaríkin 11. september 2001. Eftir að dómsorðið var kunngjört, tilkynnti Moussaoui, sem iðrast einskis, að þeir myndu aldrei handsama Osama bin Laden.

Zacarias Moussaoui reyndi að grípa fram í fyrir dómaranum, Leonie Brinkema, en hún hélt sínu striki og flutti dómsorðið ótrufluð. „Hr. Moussaoui, þú komst hingað til að verða píslarvottur í miklum dýrðarinnar hvelli, en svo vitnað sé til skáldsins T.S. Eliot, þá munt þú í staðinn deyja með kveini,” sagði dómarinn þegar hún flutti dómsorðið. Þegar hún hafði lokið máli sínu sagði Moussaoui: „Ég verð frjáls og frelsun mín verður sönnun þess að við erum hermenn Guðs og þið eruð hermenn Satans.”

Dómarinn brást við orðum Moussaoui í gær um að hann hefði unnið og að Bandaríkin hefðu tapað og sagði: „Herra Moussaoui, þegar þessum réttarhöldum lýkur munu allir aðrir í þessu herbergi fara til að njóta sólarinnar, hlýða á fuglana og þeir geta hitt hvern þann sem þá lystir. Þú munt eyða sem eftir af ævinni í öryggisfangelsi. Það er alveg ljóst hver hefur unnið.”

Moussaoui verður nú sendur í rammgert öryggisfangelsi í Colorado og þar mun hann ekki geta haft nokkuð samband við umheiminn.

Frönsk yfirvöld tilkynntu, að þau muni fara fram á að Bandaríkin framselji Moussaoui til Frakklands til að hann geti afplánað dóminn í heimalandi sínu. Beðið er eftir að heyra skilyrði dómsins og afplánunarinnar.