Mahmoud Ahmadinejad, Íransforseti, sakaði Bandaríkjamenn og bandalagsþjóðir þeirra um það í dag að leggja Írana í einelti á alþjóðavettvangi. Þá sagði sendiherra Írana hjá Sameinuðu þjóðunum að Bandaríkjamenn, Bretar og Frakkar hefðu vísvitandi skapað neyðarástand með því að leggja drög að ályktun, þar sem þess er krafist að Íranar hætti auðgun úrans fyrir öryggisráð Sameinuðu þjóðanna. Þetta kemur fram á fréttavef BBC.

Sendiherrann Javad Zarif sagði fyrirliggjandi drög að ályktun sorglega þar sem fjölmargir möguleikar hafi verið á því að finna friðsamlega lausn deilunnar. Sagði hann ályktunina lýsa vilja til að „skapa neyðarástand þar sem alls ekki hafi þurft að koma til neyðarástands.”

Utanríkisráðherra Rússlands, Sergei Lavrov, sagði einnig í dag að alþjóðasamfélagið ætti eftir að reyna að ná lausn í kjarnorkudeilunni í gegnum Alþjóðakjarnorkustofnunina, IAEA. „Það er nauðsynlegt að styðja við aðgerðir IAEA í Íran og ég vona að allt það sem alþjóðasamfélagið leggur af mörkum í málinu, í Vín og New York, miðist við það,“ sagði Lavrov.