Argentína og Úrúgvæ deila nú um áform Úrúgvæ um að reisa tvær trjámauksverksmiðjur við á sem skilur löndin að. Argentína telur að verksmiðjurnar hafi slæm áhrif á umhverfið en Úrúgvæ neitar því.

Forsætisráðherra Spánar, Jose Luis Rodriguez Zapatero hitti forseta Argentínu og Úrúgvæ á fundi en Evrópusambandsið fundar nú með leiðtogum Mið- og Suður-Ameríku í Vínarborg.

Talsmaður spænsku stjórnarinnar, Fernando Moraleda sagði að Spánn væri tilbúinn til að taka þátt í viðræðum og miðla málum komi til þess en þó taldi hann að frumkvæði þess þyrfti að koma frá hinum löndunum.

Kostnaðurinn við að byggja verksmiðjurnar mun vera um 128 milljarðar íslenskra króna og er það stærsta fjárfesting í sögu Úrúgvæ.

Fyrr í mánuðinum kærði Argentína Úrúgvæ fyrir Alþjóðadómstólinn í Haag þar sem því er haldið fram að Úrúgvæ hafi ekki gefið sér nægilegan tíma til að gera nákvæma umhverfisrannsókn og þeim áhrifum sem verksmiðjurnar kunna að hafa.

Í morgun truflaði kona á bikiníi og hnéháum stígvélum myndatöku af leiðtogahópnum í Vínarborg. Konan kynnti sig sem Evangelinu Carrozo og mótmælti hún byggingu verksmiðjanna.

„Við sögðum ríkisstjórn Úrúgvæ að ljúga ekki að fólki. Þessar trjámauksverksmiðjur menga,” sagði drottning kjötkveðjuhátíðarinnar 2006 í þorpinu Gualeguaychu áður en öryggisvörður vísaði henni á dyr.

Carrozo er í samtökum Grænfriðunga og hafði dulist á meðal ljósmyndaranna í skósíðri, svartri regnkápu áður en hún afklæddist og hóf sín þokkafullu mótmæli.