Alþjóða matsfyrirtækið Standard & Poor greindi frá því í dag, að líklegt væri að kínverska sjálfstjórnarhéraðið Macau yrði innan fárra ára tekjuhæsta fjárhættuspilasvæði heims, og tæki þar með heiðurinn af Las Vegas í Bandaríkjunum. Kína gæti þar að auki orðið annað stærsta svæði heims þar sem fjárhættuspil eru leyfð, en Bandaríkin eru stærst.

Samkvæmt greiningu S & P stefnir í að tekjur af fjárhættuspilum fari yfir 10 milljarða Bandaríkjadala á næstu fimm árum, en það mun velta að miklu leyti á nýju fjárhættuspilaumdæmi á Macau, Cotai, sem verður opnað á næsta ári með tilheyrandi hótelum og aðstöðu fyrir ferðamenn. Nálægð Macau við Kína er helsta ástæða hagnaðarins, en í fyrra heimsótti 10,5 milljón Kínverja Macau. Fjórar milljónir Kínverja fóru þangað árið 2002. Um 30% gesta í fyrra voru frá Hong Kong.

Macau var nýlenda Portúgala frá 16. öld og laut yfirráðum þeirra fram á 20. öldina, en árið 1987 gerðu Kínverjar og Portúgalar með sér samning um að Macau yrði sjálfstjórnarhérað Kína, sem það varð 20. desember 1999. Kínversk stjórnvöld hétu því að sósíalískri efnahagsstefnu yrði ekki komið þar á heldur réðu stjórnvöld á Macau sér algjörlega í þeim efnum.