Rannsókn, sem Ísraelsher hefur gert, hefur ekki leitt í ljós neinar vísbendingar um að Ísraelsmenn hafi borið ábyrgð á sprengingu á baðströnd á Gasasvæðinu sl. föstudag þar sem átta óbreyttir Palestínumenn létu lífið. Mikið uppnám varð vegna sprengingarinnar og lýstu Hamassamtökin því yfir í kjölfarið að þau virtu ekki lengur vopnahlé, sem verið hafði milli Ísraelsmanna og herskárra samtaka Palestínumanna í 16 mánuði.

Upphaflega var fullyrt að ísraelsk sprengja hefði lent á ströndinni. Ísraelsher hafði verið að varpa sprengjum á svæði ekki langt frá, en þaðan höfðu Palestínumenn skotið eldflaugum á Ísrael.

Niðurstaða innri rannsóknar hersins útilokar ekki að um hafi verið að ræða ísraelska sprengju sem missti ætlaðs marks. En líklegasta skýringin á sprengingunni sé hins vegar sú, að um hafi verið að ræða jarðsprengju sem stuðningsmenn Hamassamtakanna hafi komið fyrir á ströndinni til að hindra aðgerðir ísraelskra sérsveitarmanna.

Blaðið Yediot Aharonot segir að í rannsóknarskýrslunni segi að sprengjubrot, sem fjarlægð hafi verið úr nokkrum þeirra sem særðust í sprengingunni, virðist ekki vera úr ísraelskri sprengju og myndir sem birtust í sjónvarpi og blöðum af gígnum sem myndaðist, sýni að hann líkist sprengjugíg eftir jarðsprengju. Þá hefur leyniþjónusta Ísraelsmanna upplýsingar um að Hamas hafi komið fyrir jarðsprengjum á hluta strandarinnar nýlega.

Meir Klifi, hershöfðingi, stýrði rannsókninni og mun afhenda Dan Halutz, yfirmanni Ísraelshers, skýrsluna síðar í dag.