Kona, sem hélt því fram að hún hefði skotið eiginmann sinn fyrir slysni á meðan hún var að dansa við lag með Shaniu Twain, hefur verið dæmd í lífstíðarfangelsi fyrir morð. Linda West, sem er 49 ára gömul, segist hafa verið dansa undir áhrifum áfengis þegar skot hljóp úr haglabyssunni sem hún hélt á.

Saksóknarinn segir hinsvegar að hún hafi hlaðið skotvopnið og skotið eiginmann sinn til bana í íbúð þeirra í Southhampton í Bandaríkjunum í maí í fyrra.

Konunni var sagt að hún þyrfti að minnsta kosti að afplána 16 ár á bak við lás og slá.

Hún var fundin sek í síðustu viku eftir réttarhöld sem stóðu í tvær og hálfa viku.

Það þurfti að rétta á nýjan leik í málinu sökum þess að kviðdómendum í fyrri réttarhöldunum tókst ekki að komast að niðurstöðu varðandi morðákæruna. En konan hafði neitað sök.

Við vitnaleiðslur sagði konan að hún og eiginmaður hennar til níu mánaða hefðu verið drukkin og að hann hafi ákveðið að hún ætti að dansa við lagið með haglabyssuna.

Hún sagðist hafa slegið henni í gólfið þegar hún ætlaði að hneigja sig þegar lagið endaði snögglega, en við það hljóp skot úr byssunni. Sérfræðingar komust að þeirri niðurstöðu að öryggislásinn á byssunni væri gallaður.

Skotið hæfði eiginmanninn beint í hjartastað og hann lést samstundis þar sem hann sat.

Saksóknarinn segir að konan hefði hlaðið haglabyssuna og skotið hann af stuttu færi í kjölfar rifrildis þetta örlagaríka kvöld.