Valerie Plame, starfsmaður leyniþjónustu Bandaríkjanna CIA, hefur höfðað skaðabótamál á hendur varaforseta Bandaríkjanna, Dick Cheney, og Karl Rove, sem var einn nánasti stjórnmálaráðgjafi George W. Bush Bandaríkjaforseta, fyrir samsæri um að eyðileggja starfsferil hennar. Upplýsingaleki úr Hvíta húsinu varð til þess að það var gert opinbert að Plame, sem er eiginkona Joseph P. Wilsons, fyrrverandi sendiherra, væri starfsmaður leyniþjónustunnar CIA.

I. Lewis Libby, fyrrverandi starfsmannastjóri Dick Cheney, varaforseta Bandaríkjanna, hefur verið ákærður vegna málsins. Hann er sagður hafa reynt að hindra framgang réttvísinnar og hafa framið meinsæri en mál hans verður dómtekið í janúar.

Wilson var andvígur innrásinni í Írak og skrifaði grein þar sem hann hélt því fram að stjórn Bush hefði vísvitandi farið með rangt mál þegar fullyrt var að Írakar hefðu reynt að kaupa úrangrýti í Afríkuríkinu Níger.

Wilson hafði starfað fyrir bandarísku utanríkisþjónustuna í Níger og fór þangað á vegum CIA til að kanna hvort eitthvað væri hæft í því að Írakar hefðu gert tilraunir til að kaupa þar úran. Átti það að grafa undan gagnrýni hans að kona hans hefði haft milligöngu um að hann færi þangað, en aldrei hefur verið sýnt fram á það. Það er lögbrot að ljóstra upp nöfnum þeirra sem stunda njósnir fyrir CIA enda getur það stefnt bæði þeim og tengiliðum þeirra í hættu.

Átta dögum eftir að grein Wilsons birtist í The New York Times nafngreindi þekktur dálkahöfundur, Robert Novak, Plame í dálki sínum og tóku nokkrar fréttastofur málið upp.

Patrick Fitzgerald, sérskipaður saksóknari í rannsókninni, tilkynnti Rove í síðasta mánuði að hann yrði ekki ákærður í tengslum við rannsóknina á upplýsingalekanum en auk þremenninganna, Rove, Libby og Cheney, eru tíu ónafngreindir aðilar ásakaðir um uppljóstranirnar.