Bandaríska sendiráðið í Líbanon hefur sent Bandaríkjamönnum sem þar eru staddir leiðbeiningar um það hvernig þeim beri að haga málum vilji þeir komast burt úr landinu, en um 25.000 Bandaríkjamenn eru þar staddir. Í yfirlýsingu frá sendiráðinu segir að verið sé að leggja lokahönd á rýmingaráætlun og fólk beðið um að bíða frekari fyrirmæla.

Þeir sem vilja yfirgefa landið eru beðnir um að hafa vegabréf sín tiltæk og önnur gögn og mega ferðatöskur ekki vega meira en 15 kg. Auk þess verður fólkið að skilja gæludýr eftir. Aukastarfsmenn voru fluttir til sendiráðsins í dag til aðstoðar við þessa aðgerð og fólki sem þarfnast læknishjálpar, börnum sem týnt hafa foreldrum sínum og til hjálpar öldruðum.

„Bandaríska sendiráðið hefur sérstakar áhyggjur af Bandaríkjamönnum sem búa í suðri landsins þar sem árásir Ísraela hafa verið ákafari en annars staðar," segir í tilkynningunni. 43 Bandaríkjamenn hafa verið fluttir með þyrlum til Kýpur að sögn bandaríska varnarmálaráðuneytisins. Þá stendur til að leigja skip sem flutt getur 750 farþega og einnig líklegt að herþyrla sem staðsett er við Rauðahaf verði notuð til flutninga.