Lögreglan í Marmaris í Tyrklandi leitar nú að fleiri sprengjum í strætisvögnum og sorptunnum. „Mér skilst að það hafi fundist ein ósprungin sprengja hér á svæðinu," sagði Atli Már Gylfason blaðamaður í samtali við Fréttavef Morgunblaðsins, en hann er staddur í sumarleyfi í Marmaris. „Lögreglan er út um allt að leita, við ströndina og í þessum litlu strætóum sem margir Íslendingar hafa verið að nota og víðar þannig að þeir telja að það sé ennþá einhver hætta á ferðum," sagði Atli Már.

Hvernig er stemmningin meðal íslensku ferðamannanna? „Það eru blendnar tilfinningar, fólk trúir því ekki að það sé að lenda í einhverju svona. Þetta er eitthvað sem fólk býst ekki við," sagði Atli Már. Hann sagði að fólk forðaðist greinilega að ferðast með strætisvögnunum, „þeir eru allir hálftómir og það fer ónotatilfinning um mann er þeir fara fram hjá manni," sagði Atli Már.