Öryggisráð Sameinuðu þjóðanna samþykkti með miklum meirihluta atkvæða í dag ályktun þar sem kveðið er á um að friðargæslulið SÞ verði sent til Darfur-héraðs í Súdan. Í ályktuninni er kveðið á um að allt að 17,300 friðargæsluliðar verði sendir til héraðsins á vegum stofnunarinnar og taki þar við friðargæslu úr höndum Afríkisambandsins.

„Það er mikilvægt að ályktuninni verði hrint í framkvæmd,” sagði Lord David Triesman, aðstoðarutanríkisráðherra Bretlands í málefnum Afríkum eftir að niðurstaða atkvæðagreiðslunnar lá fyrir en Bretar og Bandaríkjamenn höfðu gengið hvað harðast fram í því að fá ályktunina samþykkta. „Alþjóðasamfélagið verður að vinna með Afríkusambandinu og ríkisstjórn Súdans að framkvæmd þess að friðargæslulið Sameinuðu þjóðanna taki við af friðargæsluliði Afríkusambandsins.”

Þá sagði hann fregnir hafa borist af ofbeldisverkum í Darfur í dag og að reynist þær réttar sanni það svart á hvítu nauðsyn þess að farið verði að ályktun Sameinuðu þjóðanna. „Bardögunum, sem hafa haft svo eyðileggjandi áhrif á líf saklausra borgara í Darfur, verður að linna. Allir deiluaðilar verða að virða það vopnahlé sem er í gildi og fara að ályktun Sameinuðu þjóðanna og friðarsamkomulaginu um Darfur. Þetta er rétta andartakið fyrir yfirvöld í Súdan að fallast á að friðargæslulið SÞ fari til Súdan. Það efast enginn um bráða nauðsyn þess,” sagði hann. „Beri yfirvöld í Súdan velferð og öryggi borgara landsins raunverulega fyrir brjósti, hafa þau enga ástæðu til annars en að fagna ályktuninni."

Yfirvöld í Súdan hafa lýst sig algerlega mótfallin því að friðargæslulið SÞ komi til landsins og segja að það muni jafngilda því að landið verði aftur gert að nýlendu.

Samkvæmt ályktun öryggisráðsins er gert ráð fyrir að allt að 17.300 friðargæsluliðar fari á vegum SÞ til Darfur en 12 af 15 þjóðum sem eiga sæti í ráðinu greiddu atkvæði með ályktuninni. Kína, Rússland og Katar sátu hins vegar hjá við atkvæðagreiðsluna.