Systkinin Simon Glasberg, 81 árs, og Hilda Shlick, 75 ára. Hittast á ný eftir 65 ára aðskilnað. AP

Shlick, sem býr í Ísrael, stóð í þeirri trú, þar til fyrir mánuði síðan að öll fjölskylda hennar, fyrir utan eina systur, hefði látið lífið í helförinni. „Ég get ekki hætt að kyssa hana,” sagði Glasberg, sem er 81 árs og búsettur í Kanada. „Eftir 65 ár hef ég fundið systurina sem ég elska.”

Sameininguna má rekja til þess að David og Benny, barnabörn Shlick, sáu í gagnagrunni Yad Vashem helfararsafnsins í Jerúsalem tilkynningu frá bróður ömmu sinnar þar sem fram kom að hún hefði látið lífið í helförinni. Í kjölfar þess notuðu þeir gagnagrunn safnsins til að grafast fyrir um örlög ættingja sinna sem ekki hafði frést af í sex áratugi og fundu slóð þeirra í þremur löndum.

Við sameininguna sagðist Glasberg hafa þekkt systur sína um leið og hann sá hana. „Mér fannst ég ekki geta talað. Ég bara grét,” sagði hann við blaðamenn á ensku en systkinin tala saman á jiddísku og rússnesku.

Systkinin urðu aðskilin árið 1941 er Hilda, sem þá var tíu ára, flúði ásamt systur sinni Berthu frá Rúmeníu til Úsbekistans. Foreldrarnir Henia og Benzion og synirnir Simon, Mark, Karol og Eddie urðu hins vegar eftir í Rúmeníu og þaðan fóru Símon og Mark til Ísraels þar sem þeir börðust í sjálfstæðisstríðinu. Foreldrar þeirra og bræður komust hins vegar til Kanada og þangað fluttu bræðurnir síðan til þeirra.

Shlick og systir hennar settust hins vegar að í Eistlandi þar sem Bertha lést árið 1970. Shlick, sem nú er 75 ára, flutti hins vegar til Ísraels með fjölskyldu sinni árið 1998.

Mark, bróðir systkinanna, er enn á lífi en of veikburða til að ferðast til Ísraels, til að hitta systur sína.