Benedikt páfi mun hitta sendifulltrúa múslímaríkja í dag en tilgangur fundarins er að lægja öldurnar í samskiptum kaþólsku kirkjunnar og íslamista. Mikil reiði hefur ríkt á meðal þeirra í garð páfa sem móðgaði þá í ræðu sem hann flutti í Regensburg í Þýskalandi. Í kjölfarið lýsti páfi því yfir að honum þætti leitt að hann hefði móðgað múslíma og hann lýsti því jafnframt yfir að hann bæri mikla virðingu fyrir íslamstrú.

Fréttaskýrandi BBC í Róm segir að páfi sé að rétta múslímum sáttarhönd og að hann sé að reyna sannfæra þá að honum sé alvara með að bæta tengsl trúarbragðanna, en ekki eru fordæmi fyrir slíku.

Leiðtogar múslíma hafi krafist þess að páfi biðjist afsökunar á ótvíræðan hátt.

Jose Manuel Durao Barroso, forseti framkvæmdastjórnar Evrópusambandsins, hefur komið páfa til varnar en hann segir að fleiri Evrópuleiðtogar ættu að hafa tekið upp hanskann fyrir páfa.

„Ég varð fyrir vonbrigðum þegar það voru ekki fleiri leiðtogar í Evrópu sem sögðu: „Að sjálfsögðu á páfinn rétt á því að lýsa yfir skoðunum sínum,““ sagði Barroso í viðtali við þýska dagblaðið Welt am Sonntag.

„Vandamálið er ekki þau ummæli sem páfinn lét falla heldur viðbrögð öfgamannanna.“