Maður sem hefur setið á bak við lás og slá í 21 ár fyrir að hafa nauðgað eiginkonu lögreglumanns var í sleppt í dag eftir að DNA-rannsókn leiddi sakleysi hans í ljós. Scott Fappiano, sem er 44 ára gamall, var sleppt lausum eftir að hann mætti fyrir dómara New York í dag, degi eftir að rannsóknarniðurstöður sýndu fram á að DNA-erfðaefni hans passaði ekki við það DNA-erfðaefni sem fannst á glæpavettvangi.

Dómarinn fyrirskipaði að Fappiano skyldi verða sleppt lausum eftir að saksóknarinn í New York varð við ósk lögmanna sem starfa fyrir Sakleysisverkefnið (e. Innocence Project) sem notast við DNA-rannsóknir til þess að bera sakir af föngum.

Málið má rekja til ársins 1983 þegar árásarmaður braust inn á heimili lögreglumanns í Brooklyn á meðan hann og eiginkona hans voru sofandi. Árásarmaðurinn batt lögreglumanninn og nauðgaði eiginkonunni.

Fappiano var handtekinn árið 1984. Sama ár var fyrst réttað yfir honum þrátt fyrir að blóðrannsóknir hafi ekki náð að leiða í ljós tengsl milli hans og sönnunargagna sem fundust á vettvangi. Aðalsönnunargagnið í málinu gegn Fappiano var hinsvegar eiginkona lögreglumannsins en hún benti á hann við sakbendingu. Fappiano er þó rúmum 10 cm lægri heldur en maðurinn sem konan lýsti fyrir lögreglu eftir árásina.

Eiginmaður konunnar benti hinsvegar ekki á Fappiano við sömu sakbendingu.

Þess má geta þess að móðir mannsins fagnaði honum ákaft þegar honum var loks sleppt lausum eftir að hafa varið rúmum tveimur áratugum í fangelsi.