Washington. AFP. | Kommúnistastjórnin í Norður-Kóreu lýsti því yfir í gær, að litið yrði á harðar refsiaðgerðir af hálfu öryggisráðs Sameinuðu þjóðanna sem "stríðsyfirlýsingu", jafnframt því sem hún hótaði að gera frekari tilraunir með kjarnavopn léti Bandaríkjastjórn ekki af þrýstingi sínum á að gripið yrði til refsiaðgerða.

Á sama tíma varaði George W. Bush Bandaríkjaforseti norður-kóresk stjórnvöld við því, að tilraunir landsins með kjarnavopn væru ógn við friðinn sem myndi hafa "alvarlegar afleiðingar". Bush forseti tók hins vegar fram, að Bandaríkjastjórn myndi leggja áherslu á að leysa deiluna við samningaborðið fremur en að beita hervaldi gegn Norður-Kóreu.

Enn er eftir að staðfesta að Norður-Kórea hafi í raun gert tilraun með kjarnavopn aðfaranótt mánudags en grunur um sprengingu í fyrrinótt reyndist ekki á rökum reistur.

Sammála um nauðsyn aðgerða

Engu að síður hafa yfirlýsingar stjórnarinnar í Pyongyang um tilraunirnar valdið spennu og hafa Japanar þegar bannað innflutning á vörum frá Norður-Kóreu. Þá sagði John Bolton, sendiherra Bandaríkjanna hjá Sameinuðu þjóðunum, að bandarísk stjórnvöld myndu leggja fram drög að nýrri ályktun um N-Kóreu í öryggisráðinu í dag sem vonir stæðu til að yrði samþykkt í dag eða á morgun.

Í yfirlýsingu frá Kim Jong-Il, leiðtoga N-Kóreu, sagði hins vegar, að refsiaðgerðir myndu koma í veg fyrir að stjórn hans gæti snúið aftur að samningaborðinu.