Staðfest var nú fyrir stuttu að Bandaríkjamenn eru orðnir 300.000.000. Einn bandarískur ríkisborgari fæðist á 11 sekúndna fresti þannig að talið var erfitt að segja nákvæmlega til um hvenær þeir væru orðnir 300 milljónir, en samkvæmt upplýsingum frá bandarísku hagstofunni náðu þeir markinu klukkan 11:45 að íslenskum tíma, að því er fram kemur á fréttavef Sky.

„Ég efast um að nokkur muni trúa því að það hafi gerst á mínútunni, en ég held að við séum ansi nálægt því,“ sagði Howard Hogan hjá hagstofunni að þessu tilefni.

Þegar Bandaríkjamenn náðu 200.000.000 markinu árið 1967 hélt Lyndon B. Johnson þáverandi forseti sérstakan blaðamannafund þar sem hann fór lofsamlegum orðum um sögu þjóðarinnar. Tímaritið Life fór einnig á stúfana og fullyrti að ungur drengur í Atlanta hefði verið Bandaríkjamaður númer 200.000.000.

Ekki er búist við sérstökum hátíðarhöldum eða umstangi að þessu sinni af hálfu Hvíta hússins.

Bandaríkjamönnum fjölgar um 2,8 milljónir á hverju ári, sem er tæplega 1% fjölgun. 40% af þessum 2,8 milljónum eru innflytjendur, en 60% er mismunur á fæðingum og dauðsföllum.

Bandaríkin eru í þriðja sæti yfir fjölmennustu ríki heims, á eftir Kína og Indlandi. Næstu ríki á eftir eru Indónesía, Brasilía, Pakistan, Rússland, Nígería, Bangladesh og Japan.