Condoleezza Rice, utanríkisráðherra Bandaríkjanna, er væntanleg til Moskvu þar sem hún mun ræða málefni Norður-Kóreu við stjórnvöld í Rússlandi. Rice er að tryggja það að Rússar muni beita Norður-Kóreu refsiaðgerðum líkt og samþykkt öryggisráðs Sameinuðu þjóðanna kveður á um. Er Rússland fjórða landið sem hún heimsækir til að leita stuðnings við refsiaðgerðum en hún hefur þegar sótt Japan, Suður-Kóreu og Kína heim.

Suður-kóreska Yonhap-fréttastofan fullyrti í gær, að Kim Jong-Il, leiðtogi kommúnistastjórnarinnar í Norður-Kóreu, hefði fullvissað Tang Jiaxuan, sendifulltrúa Kínverja, um að ekki væri fyrirhugað að gera frekari tilraunir með kjarnavopn í landinu. Tang var sendur af Hu Jintao Kínaforseta til viðræðna við stjórn kommúnista í Pyongyang, og er sagður hafa hvatt Kim til að endurtaka ekki tilraunina með kjarnavopn þann 9. október sl. Á fundi sínum með Condoleezzu Rice, utanríkisráðherra Bandaríkjanna, í Peking staðfesti Tang hins vegar ekki að Kim hefði lýst þessu yfir heldur sagði aðeins að fundur sinn með leiðtoganum hefði „ekki verið til einskis".

Rice mun eiga fundi með forseta Rússlands, Vladimír Pútín, utanríkisráherranum, Sergei Lavrov og varnarmálaráðherranum, Sergei Ivanov, að því er fram kemur á fréttavef BBC.