Danski þingmaðurinn Naser Khader, sem situr á þingi fyrir flokkinn Radikale venstre, hefur það í hendi sér að fella meirihluta dönsku ríkisstjórnarinnar, samkvæmt nýrri skoðanakönnun Gallup, gangi hann til liðs við Miðjuflokkinn CD. Þetta kemur fram á fréttavef Jyllands-Posten

Samkvæmt könnuninni myndi CD fá tuttugu þingmenn á danska þinginu gengi Khader til liðs við flokkinn og væri gengið til kosninga nú en við það yrði flokkurinn þriðji stærsti flokkurinn á þingi og ríkisstjórn Venstre og danska þjóðarflokksins undir forystu Anders Fogh Rasmussen myndi missa meirihluta sinn á þingi.

Forsvarsmenn CD hafa falast eftir samstarfi við Khader að undanförnu og jafnvel boðið honum að leiða flokkinn. Hann lýsti því hins vegar yfir eftir að niðurstöður könnunarinnar voru birtar í morgun að hann hefði ekki í hyggju að skipta um flokk. „Mér líður vel í Radikale. Ég er ekki liðsmaður CD og ég þekki ekki stefnuskrá þeirra. Ég er ekki að skipta yfir í CD,” sagði hann. Þá kvaðst hann þakklátur fyrir það traust sem honum væri sýnt en að honum fyndist málið þó allt hið undarlegasta.

Naser Khader er einn vinsælasti stjórnmálamaður Danmerkur eftir að hann stofnaði Samtök lýðræðissinnaðra múslíma (Demokratiske Muslimer) í kjölfar þeirrar spennu sem varð á milli Dana og múslíma vegna Múhameðsteikningamálsins síðastliðinn vetur. Hann er fæddur í Damaskus, sonur sýrlenskrar móður og palestínsks föður og flutti sjö ára til Danmerkur.