Vladimír Pútín Rússlandsforseti hitti í dag Ali Larijani, aðalsamningamann Írana í kjarnorkumálum, að því er fram kemur í rússneskum fjölmiðlum. Auk þeirra taka þátt í fundinum þeir Sergei Lavrov, utanríkisráðherra Rússlands, og Igor Ivanov, öryggisráðgjafi forsetans. Að sögn fjölmiðlanna ITAR-Tass og RIA Novosti fer fundurinn fram á sveitasetri Pútíns sem er skammt fyrir utan Moskvu.

Talið er að fundurinn sé vísbending um að Rússar ætli að auka diplómatískan þrýsting sinn á að Íranar breyti um stefnu varðandi kjarnorkuáætlun sína.

Eftir að hafa lokið fyrstu fundarlotu með rússneskum embættismönnum í gær sagði Larijani að Íransstjórn muni ekki hvika frá kjarnorkuáætlun sinni. Þá gaf hann í skyn að Íranar myndu slíta öll tengsl við Alþjóðakjarnorkumálastofnunina (IAEA) ef alþjóðasamfélagið myndi taka upp á því að beita Íran refsiaðgerðum líkt og Evrópuþjóðir hafa lagt til að verði gert.

Larijani segir að Íranar vilji semja til þess að slaka á þeirri síauknu spennu sem hefur myndast vegna málsins, en Bandaríkin og fleiri ríkin óttast það Íranar ætli sér að búa til kjarnorkuvopn. Larijani sagði hinsvegar að Íranar muni ekki hverfa frá því að gera kjarnorkutilraunir í friðsömum tilgangi.

Rússnesk stjórnvöld leitast við að blása nýju lífi í þær tillögur sem þau hafa þegar lagt fram sem eru að Rússar taki að sér að auðga úran fyrir Írana. Þeir telja að slíkt myndi róa taugar alþjóðasamfélagsins sem hefur áhyggjur að kjarnorkuvopnavæðingu Írans. Í gær sagði Larijani að tillögurnar væru enn á borðinu en það væri ekkert sem benti til þess að írönsk stjórnvöld muni ganga að því samkomulagi.