Einn þeirra, sem tóku þátt í svonefndu Mockfjärdsráni í Svíþjóð árið 1983 sagðist við yfirheyrslur árið 1997 hafa selt Christer Pettersson, byssu sem notuð var í ráninu og talið er að hafi verið notið til að myrða Olof Palme, forsætisráðherra Svíþjóðar, árið 1986.

Kafarar á vegum sænska blaðsins Expressen fundu í vikunni skammbyssu í vatni í Dölunum og afhentu lögreglu sem rannsakar nú, hvort um er að ræða fyrrgreinda byssu.

Að sögn Expressen segir í dag að maður, sem nefndur er Pekka og tók þátt í svonefndu Mockfjärdsráni, hafi haft byssuna undir höndum og sent Christe Pettersson hana árið 1985. Pettersson var á sínum tíma fundinn sekur um morðið á Palme en síðan sýknaður af áfrýjunarrétti.

Annar maður, sem tók þátt í ráninu, fullyrðir hins vegar að byssunni hafi verið kastað í vatnið þegar árið 1983.

Líklegt þykir, að byssan hafi verið notuð við rán í pósthúsi í Mockfjärd 1983 en þá var einn viðskiptavinur þess skotinn í fótinn. Var kúlan rannsökuð og síðar kom í ljós, að efnasamsetning hennar, blýsamsæturnar, var sú sama og í kúlunum tveimur, sem fundust á Sveavägen eftir morðið á Olof Palme. Eru kúlurnar þrjár af sömu gerð og þær, sem hinn fyrri og rétti eigandi byssunar átti og ekki var stolið í innbrotinu. Það bendir því flest til þess, að sama byssan hafi verið notuð í bæði skiptin. Þótt rannsókn sýni, að byssan hafi verið notuð við morðið á Palme, getur hins vegar orðið þrautin þyngri að tengja hana við einhvern ákveðinn mann.

Olof Palme var myrtur 28. febrúar 1986. Voru þau hjónin, Lisbeth og hann, að koma úr kvikmyndahúsi er maður kom að þeim og skaut Palme.

Við sakbendingu benti Lisbeth á Christer Pettersson, afbrotamann og eiturlyfjaneytanda, og var hann dæmdur í undirrétti í júlí 1989. Var dóminum áfrýjað og í hæstarétti var málinu vísað frá vegna skorts á sönnunum.

Lisbeth og börn þeirra Palme og raunar mjög margir Svíar eru enn viss um, að Christer Pettersson hafi orðið Palme að bana. Líkur á, að málið upplýsist hafa hins vegar dofnað mjög með árunum og eru ekki miklar enda lést Pettersson fyrir tveimur árum.