Írönsk stjórnvöld segjast ætla að hefja auðgun úrans að nýju en í gær samþykkti öryggisráð Sameinuðu þjóðanna refsiaðgerðir gagnvart Írönum fyrir að fara ekki að ályktunum SÞ um að hætta slíkri starfsemi. Mahmoud Ahmadinejad, forseti Írans, sagði í morgun að öryggisráðið muni fljótlega sjá eftir að hafa samþykkt refsiaðgerðirnar.

„Íran hefur engar áhyggjur og er ekki í neinu uppnámi yfir því að öryggisráðið skuli hafa samþykkt ályktunina," hafði fréttastofan IRNA í Íran eftir Ahmadinejad.

Ali Larijani, aðalsamningamaður Írana í kjarnorkumálum, sagði í dag að Íranar muni halda áfram við að koma upp 3000 skilvindum í kjarnorkuverinu í Natanz. Verinu var lokað árið 2003 en opnað að nýju og sagt að til stæði að stækka það.

„Við höfum ítrekað sagt, að ef Vesturveldin vilja misnota öryggisráðið þá mun það ekki aðeins missa áhrif sín heldur einnig gera okkur staðfastari í þeirri fyrirætlan að koma upp kjarnorkuvinnslu," sagði Larijani við blaðið Kayhan.

Í ályktuninni, sem samþykkt var samhljóða á fundi öryggisráðsins í gær, er lagt bann við að útvega Írönum hráefni til kjarnorkuvinnslu og einnig verða ýmsar eignir Írana í útlöndum frystar. Bandarískir embættismenn höfðu þrýst á harðari aðgerðir.

Þá er þess krafist í ályktuninni, að Íranar hætti allri vinnu við auðgun úrans en auðgað úran er bæði notað sem eldsneyti fyrir kjarnorkuver og til að smíða kjarnorkusprengjur.