Yfir eitt þúsund breskir hermenn réðust inn í höfuðstöðvar írösku lögreglunnar í Basra í morgun til að frelsa 126 fanga, sem þar voru, en upplýsingar höfðu borist um að til stæði að taka fangana af lífi. Lögreglustöðin var eyðilögð og breska ríkisútvarpið, BBC, hefur eftir talsmanni breska hersins, að lögreglusveitin, sem átti að berjast við alvarlega glæpi, hafi verið leyst upp en grunur leikur á að dauðasveitir hafi starfað innan lögreglusveitarinnar. Sjö Írakar féllu í skotbardaga sem braust út við lögreglustöðina.

Í morgun handtóku bandarískar hersveitir í Írak tvo íranska sendimenn, sem Jalai Talabani, forseti Íraks, hafði boðið þangað. Talsmaður forsetans sagði við AFP fréttastofuna, að forsetinn væri afar óánægður með handtökurnar. Bandaríkjamenn hafa sakað írönsk stjórnvöld um að útvega herskáum sjítum í Írak vopn og fé og einnig tækniaðstoð við að smíða sprengjur, sem notaðar eru gegn bandarískum hermönnum í Írak. Íranir segjast aðeins hafa pólitísk og trúarleg tengsl við sjíta í Írak.

Að sögn Charlie Burbridge, majórs í breska hernum, var ákveðið að láta til skarar skríða gegn lögreglustöðinni í Basra eftir að sjö íraskir lögreglumenn voru handteknir á föstudag, grunaðir um spillingu og aðild að dauðasveitum.

Burbridge segir, að um tíma hafi verið rætt um að hreinsa til innan lögreglunnar í Basra og nú hafi það verið gert. Umrædd lögreglusveit hafi átt aðild að morðum bæði á Írökum og erlendum hermönnum.

Fangar sem voru í lögreglustöðinni, voru fluttir í annað fangelsi eftir að heilsufar þeirra hafði verið metið.

Basra er önnur stærsta borg Íraks. Þar hafa flokkar síja-múslima barist innbyrðis um völd. Um 7200 breskir hermenn eru á svæðinu í og við Basra.