Bretland mun á morgun greiða síðustu afborgunina af lánum, sem Bandaríkin og Kanada veittu landinu til stríðsreksturs í síðari heimsstyrjöld og uppbyggingar eftir styrjöldina. Afborgunin til Kanada nemur 83,25 milljónum dala og til Bandaríkjanna 22,7 milljónum dala.

Bandaríkin lánuðu Bretlandi 4,33 milljarða dala árið 1945 og Kanadamenn 1,19 milljarða dala árið 1946. Byrjað var að greiða af lánunum árið 1950 en þau báru 2% ársvexti.

Bretar notuðu féð m.a. til að kaupa olíu, mat, vopn og önnur hergögn.

„Í þessari viku uppfyllum við loks að fullu skuldbindingar okkar gagnvart Bandaríkjunum og Kanada vegna stuðningsins sem þau veittu okkur fyrir 60 árum," sagði Ed Balls, aðstoðarfjármálaráðherra Breta. „Þetta var mikilvægur stuðningur sem gerði Bretum kleift að sigrast á Þýskalandi nasista og tryggja frið og framfarir eftir stríðið."

Árið 1950 námu skuldir Bretlands 200% af vergri landsframleiðslu en nú er samskonar hlutfall 36,8%.

Bretar skulda enn lán, sem þeir fengu í fyrri heimsstyrjöldinni. En í heimskreppunni á fjórða áratug síðustu aldar var samþykkt, að frysta afborganir af slíkum lánum og hefur ekkert verið greitt af þeim frá árinu 1934.