Ónafngreindur sérfræðingur Hvíta hússins í Washington segir hugsanlegt að Saddam Hussein verði tekinn af lífi á allra næstu dögum. Hann kveðst þó hafa heimildir fyrir því að það verði hvorki í kvöld né á morgun. „Það er ákvörðun írösku ríkisstjórnarinnar,” sagði hann og bætti því við að aftakan muni líklega leiða til ofbeldisverka í írak þar sem uppreisnarmenn þar nýti sér allar hugsanlegar ástæður til að réttlæta ofbeldi.

Áfrýjunarréttur í Írak staðfesti á þriðjudag dauðadóm yfir Saddam og sagði einn dómara réttarins, Arif Shaheen, þá að úrskurðurinn þýddi að Saddam yrði hengdur innan mánaðar.

Þá sagði hann að Saddam Hussein gæti ekki áfrýjað dómnum aftur. Aftakan þyrfti að fara fram innan mánaðar og ekki væri hægt að setja ný lög til að veita Saddam Hussein sakaruppgjöf eða milda dóminn.

Saddam var dæmdur til dauða 5. nóvember fyrir að fyrirskipa dráp á 148 sjítum í bænum Dujail árið 1982 eftir að reynt var að ráða hann af dögum. Hann hefur einnig verið ákærður fyrir að fyrirskipa dráp á 182.000 Kúrdum árið 1988. Við drápin var beitt stórskotaliði, loftárásum, dauðabúðum og efnavopnum.