John Prescott, aðstoðarforsætisráðherra Bretlands, sagði að það framkvæmd aftöku Saddams Husseins, forseta Íraks, hefði verið ömurleg og það væri algerlega óviðunandi, að myndir, sem teknar voru af aftökunni með farsíma, hefðu lekið út.

Prescott sagði við breska ríkisútvarpið, BBC, að þeir sem bæru ábyrgð á því að taka og dreifa myndskeiðinu af aftöku Saddams ættu skilið fordæmingu.

Prescott var mun harðorðari en Margaret Beckett, utanríkisráðherra Bretlands, sem sagði á laugardag að Saddam hefði verið gerður ábyrgur gerða sinna en ítrekaði jafnframt andstöðu Breta við dauðarefsingu.

Á myndbandinu, sem tekið var með farsíma, sést að aftaka Saddams var mun óskipulagðari en írösk stjórnvöld vildu vera láta og menn, sem viðstaddir voru hæddu Saddam og fordæmdu hann.

„Mér finnst þessi framkoma ömurleg," sagði Prescott við BBC og bætti við að ummæli sín kynnu að valda deilum.

Tony Blair, forsætisráðherra Bretlands, er í fríi ásamt fjölskyldu sinni á Miami og dvelur í húsi Robins Gibbs, söngvara Bee Gees. Blair hefur verið gagnrýndur fyrir að að gefa ekki út sérstaka yfirlýsingu um aftöku Saddams.