Nuri al-Maliki, forsætisráðherra Íraks, hótaði í dag að endurskoða samskipti Íraks við þær þjóðir, sem hafa gagnrýnt aftöku Saddams Husseins, fyrrum forseta Íraks. Sagði al-Maliki í ræðu, að aftakan væri íraskt innanríkismál sem aðrar þjóðir ættu ekki að skipta sér af.

„Ríkisstjórn Íraks kann að verða að endurskoða samband sitt við hvert það ríki, sem virðir ekki óskir írösku þjóðarinnar," sagði al-Maliki í ræðu, sem hann flutti í tilefni af 86 ára afmæli Írakshers. „Við teljum aftöku einræðisherrans vera innanríkismál sem komi aðeins írösku þjóðinni við."

Þá sagði forsætisráðherrann, að írösk stjórnvöld teldu að gagnrýni á aftökuna væru frekleg afskipti af íröskum innanríkismálum og vanvirða við tilfinningar fjölskyldna fórnarlamba Saddams og samverkamanna hans.

Margir þjóðarleiðtogar hafa að undanförnu gagnrýnt hvernig staðið var að aftöku Saddams og sagt, að hún hafi frekar líkst hengingu án dóms og laga frekara en vel skipulögð formleg aftaka. Komið hefur í ljós að verðir hæddu Saddam á dauðastundinni. Hosni Mubarak, forseti Egyptalands, sagði m.a. í gær að aftakan hefði gert Saddam að píslarvætti.

Al-Maliki sagði að aftaka Saddams hefði ekki verið pólitísk aðgerð, eins og ýmsir hefðu haldið fram. Aftakan hefði farið fram eftir að réttlát réttarhöld hefðu farið fram fyrir löglegur dómstóli og Saddam hefði í raun ekki átt slík réttarhöld skilið í ljósi þeirra svívirðilegu glæpa, sem hann framdi gegn írösku þjóðinni, landi sínu og stofnunum þess.

Þá sagði forsætisráðherrann, að stjórnvöld muni ekki hika við að framfylgja dómum yfir öðrum fyrrum embættismönnum, sem hefðu svívirt írösku þjóðina og hefði blóð hennar á höndum sér. Tveir af fyrrum samverkamönnum Saddams, Barzan Ibrahim al-Tikriti og Awad Ahmed al-Bandar, voru einnig dæmdir til dauða ásamt Saddam fyrir að láta myrða 148 sjíta frá bænum Dujail á níunda áratug síðustu aldar. Búist er við að mennirnir tveir verði brátt teknir af lífi, jafnvel í fyrramálið.