Fyrrum einræðisherranum Manuel Antonio Noriega verður að öllum líkindum sleppt úr fangelsi í Bandaríkjunum þann 9. september nk. Að sögn lögfræðings Noriega hyggst hann snúa aftur til Panama og verjast þar ásökunum um að hafa fyrirskipað morð á tveimur pólitískum andstæðingum sínum.

Noriega sem er sjötugur var forseti Panama í átta ári, en valdatíð hans lauk í desember árið 1989 þegar Bandaríkjamenn gerðu innrás í landið til að þröngva honum frá völdum. Hann var síðar dæmdur til 30 ára fangelsisvistar fyrir að hafa leyft kókaínsendingum frá Kólumbíu að fara um landið og peningaþvætti, og hefur síðan verið vistaður í alríkisfangelsi í Miami í Bandaríkjunum.

Noriega hefur einnig hlotið tvo tuttugu ára fangelsisdóma í Panama fyrir að hafa fyrirskipað aftökur á andófsmanninum Hugo Spadafora og Moises Giroldi, sem reyndi að steypa Noriega af stóli meðan hann var majór í panamíska hernum.

Að sögn lögfræðings Noriega hyggst einræðisherrann fyrrverandi fara með flugi til Panama um leið og hann losnar úr fangelsi, og áfrýja dómunum. „Hann vill fara aftur til Panama og eiga þar náðug eftirlaunaár með barnabörnum sínum”.