Ríkisstjórn Ísraels kaus í dag arabískan múslíma inn í stjórnina í fyrsta sinn í sögu landsins. Skrifstofa forsætisráðherrans gaf út tilkynningu þess efnis í dag að Gahleb Majadleh sem er 53 ára flokksmaður í Verkamannaflokknum mun verða ráðherra án ráðuneytis.

Hátt settur embættismaður tjáði AFP fréttastofunni að ráðningin hefði verið samþykkt af öllum ráðherrum ríkisstjórnarinnar fyrir utan Avigdor Lieberman sem er ofur-þjóðernissinnaður.

Þetta skref hefur verið túlkað sem aðför Verkamannaflokksins gegn þjóðernissinnum sem hafa horn í síðu ísraelskra araba sem eru um 20% þjóðarinnar.

2001 var Salah Tarif, sem tilheyrir minnihluta Drúsa í Ísrael, gerður að ráðherra án ráðuneytis en hann sagði af sér skömmu síðar vegna kæru um spillingu. Hann hlaut dóm í desember 2003.

Lieberman hefur verið sakaður um kynþáttafordóma vegna tilmæla hans um að flytja ætti ísraelska araba nauðungarflutningum yfir á Vestur Bakkann.