Ali Larijani, aðalsamningamaður Írana í kjarnorkumálum, sagði á alþjóðlegri öryggismálaráðstefnu í München í Þýskalandi í dag, að Íranar séu reiðubúnir að leysa úr öllum deilumálum við Alþjóðakjarnorkumálastofnunina innan þriggja vikna.

Alþjóðakjarnorkumálastofnunin segist ekki hafa fundið neinar vísbendingar um að Íranar séu að smíða kjarnorkuvopn. En stofnunin hefur hætt tiltekinni aðstoð við Írana, tímabundið, og gagnrýnir þarlend stjórnvöld fyrir að leyna tiltekinni kjarnorkutengdri starfsemi og svara ekki spurningum um kjarnorkuáætlun sína.

„Ég hef skrifað Mohamed ElBaradei, (framkvæmdastjóra Alþjóðakjarnorkustofnunarinnar) og sagt honum að við séum tilbúnir innan þriggja vikna til að leysa úr öllum óleystum málum," sagði Larijani í dag.

Alþjóðakjarnorkumálastofnunin lýsti því yfir á föstudag, að hún hefði hætt að veita Írönum tækniaðstoð. Um er að ræða táknrænar refsiaðgerðir, sem aðeins Norður-Kóreumenn og Írakar hafa áður verið beittir.

Öryggisráð Sameinuðu þjóðanna hefur krafist þess að Íranar hætti auðgun úrans. Mahmoud Ahmadinejad, forseti Írans, sagði á útifundi þar í landi í dag, að Íranar muni ekki hætta auðgun úrans en þeir væru reiðubúnir til að ræða við alþjóðasamfélagið.

Larijani sagði í dag að kjarnorkuáætlun Írana væri engin ógn við Ísrael. „Við ætlum ekki að ráðast á nokkurt annað ríki," sagði hann.