Ekki hefur enn verið greint frá niðurstöðum endurskoðunar Bandarísku geimvísindastofnunarinnar NASA á sálfræðimati geimfara stofnunarinnar en ákveðið var að slík endurskoðun færi fram eftir að geimfarinn Lisa Nowak var í síðustu viku sökuð um tilraun til morðs af yfirlögðu ráði. Þetta kemur fram á fréttavef CNN.

Upplýsingar um að lögregla hafi verið kölluð að heimili Nowak í nóvember á síðasta ári hafa aukið þrýsting á NASA í málinu en lögregla mun hafa verið kölluð á staðinn eftir að nágranni tilkynnti um hljóð sem bentu tl þess að verið væri að kasta diskum í vegg. Einnig hefur komið fram að Colleen Shipman, sem Nowak er sögð hafa ætlað að myrða, hafi borið við yfirheyrslu hjá lögreglu að Nowak hafi setið um sig í nokkra mánuði en báðar eru þær taldar hafa átt í ástarsambandi við flugstjórann Bill Oefelein.

Nowak hefur ekki tjáð sig opinberlega um málið en fjölskylda hennar hefur sent frá sér yfirlýsingu þar sem fram kemur að hún hafi nýlega skilið við eiginmann sinn til 19 ára en saman eiga þau son á táningsaldri og ungar tvíburadætur.

„Sé litið bæði til einkalífs hennar og starfsferils er greinilegt að nýliðnir atburðir eru algerlega úr takt við persónuleika hennar og hafa algerlega slegið fjölskylduna út af laginu,” segir í yfirlýsingu fjölskyldunnar. „Við vonum að almenningur muni hafa þetta í huga og hrapa ekki að ályktunum fyrr en öll gögn eru komin fram í málinu og dómskerfið hefur fjallað um það með eðlilegum hætti.

Jonathan Clark, ekkill geimfarans Laurel Clark sem fórst með geimferjunni Columbiu árið 2003, hefur einnig varið Nowak opinberlega og m.a. sagt hana hafa aðstoðað ungan son sinn við að takast á við móðurmissinn.

„Lisa var til staðar fyrir okkur. Það skapaðist augljóslega mikið tómarúm í lífi sonar míns við að missa móður sína en það var dásamlegt að sjá hvernig andlit hans lýsti upp þegar hann var nálægt Lisu,” segir hann. „Þeir geimfarar sem einnig eru mæður tengjast sérstökum böndum. Það er hættulegt starf að vera geimfari og þær eru á einhvern hátt klofnar á milli þess að vera mæður og geimfarar.