Kínversk stjórnvöld hafa ákveðið að banna notkun grísa í sjónvarpsauglýsingum í ríkisstjónvarpi landsin á ári svínsins, sem er nýhafið. Tilgangurinn er að sýna minnihluta múslima í landinu tillitssemi, en á bilinu 20 – 30 milljónir múslima búa í Kína. Vefsíða Berlingske Tidende segir frá þessu.

Jin Ru Bin, talsmaður samtaka múslima í Kína hefur þakkað stjórnvöldum sérstaklega fyrir að sýna minnihlutahópum í landinu virðingu með viðleitninni. Meðal auglýsinga sem hætt hefur verið við að sýna eru teiknaðar auglýsingar með grísum á vegum matvælarisans Nestlé, þá ákvað fyrirtækið Coca-Cola að nota panda-birni í nýja auglýsingaherferð í stað grísa.

Marga grunar að ákvörðunin sé þó liður í stærri markaðsherferð sem miði að því að afla sér velvildar hjá olíuþjóðum í Miðausturlöndum, en Kínverjar eru mjög háðir olíuinnflutningi og vilja síður líta út fyrir að vera bandamenn Vesturlanda í einu og öllu.