Sergei Lavrov, utanríkisráðherra Rússland ítrekaði í dag áhyggjur Rússa af áformum Bandaríkjamanna um að koma upp eldflaugavörnum í Póllandi og Tékklandi, en sagði að þótt Rússar myndu bregðast við kæmi ekki til greina að taka þátt í nýju vígbúnaðarkapphlaupi við Bandaríkin.

Stjórnvöld í Póllandi og Tékklandi gáfu í gær til kynna að þau væru reiðubúin til að taka þátt á áætlunum um að setja upp tíu eldflaugar í Póllandi og ratsjárkerfi í Tékklandi.

„Rússland mun bregðast við ógn við þjóðaröryggi á vandlega ígrundaðan og viðeigandi hátt, og mun ekki leyfa neinum að draga sig inn í ágreining, nýtt vígbúnaðarkapphlaup”, sagði Lavrov í ræðu sem hann hélt í dag við háskóla í Moskvu.

Vladimír Pútín, forseti Rússlands hefur sagst vantreysta fullyrðingum Bandaríkjamanna um að áformin miði að því að bregðast við ógn sem stafi af Írönum og N-Kóreubúum, og hefur heitið gagnaðgerðum.

Á ráðstefnu um öryggismál í Munchen fyrr í mánuðinum gagnrýndi Pútín bandaríska utanríkisstefnu og sakaði stjórnvöld í Washington um að beita óþörfu valdi og hrinda af stað vígbúnaðarkapphlaupi á heimsvísu.