Yfirvöld í Bandaríkjunum hafa ákveðið að láta fara fram rannsókn á því hvort umönnun bandarískra hermanna, sem særst hafa í hernaðinum í Írak og Afganistan, sé á einhvern hátt ábótavant en aðbúnaður særðra hermannaá hersjúkrahúsum Bandaríkjahers hefur verið harðlega gagnrýndur í bandarískum fjölmiðlum að undanförnu. Þetta kemur fram á fréttavef BBC.

Hefur því m.a .verið haldið fram í dagblaðinu Washington Post að særður hermenn búi við ágang nagdýra og kakkalakka á Walter Reed Army hersjúkrahúsinu í nágrenni Washington en 700 særðir hermenn eru þar til meðferðar.

„Það hefur mikil svívirða átt sér stað. Við verðum að ganga úr skugga um að þau vandamál sem eru til staðar verði leyst,” segir Tony Snow, talsmaður Hvíta hússins, um málið. Þá segir hann karla og konur sem þjónað hafi Bandaríkjunum eiga skilið bestu umönnun sem völ sé á.

Bandaríska varnarmálaráðuneytið Pentagon hefur lýst því yfir að farið verði yfir þær athugasemdir sem komið hafi fram varðandi Walter Reed og National Naval sjúkrahús sjóhersins í Maryland.