Vladimír Pútín Rússlandsforseti og Sergei Lavrov, utanríkisráðherra Rússlands hafa lýst áhyggjum sínum af umræðu um hernaðaraðgerðir gegn Íran. Ítrekuðu Pútín og Lavrov í viðræðum, sem sjónvarpað var í dag, kröfu stjórnvalda í Moskvu um að semja um lausn kjarnorkudeilu Írana við Vesturlönd.
Í ræðunni gáfu embættismennirnir í skyn að Bandaríkjamenn séu of yfirlýsingaglaðir í ummælum sínum á sama tíma og fastafulltrúarnir fimm í öryggisráði SÞ ásamt Þjóðverjum hafa fundað um málið.
Lavrov segir að vissulega hafi írönsk stjórnvöld ekki veitt fullnægjandi svör við spurningum Alþjóðakjarnorkumálastofnunarinnar, sem nú reynir að komast til botns í því hvort Íranar ætli að koma sér upp kjarnavopnum. Á hinn bóginn valdi getgátur og spár um að gerðar verði árásir á Íran áhyggjum og benti Lavrov á að Cheney hefði ekki útilokað þann möguleika í nýlegum ummælum sínum.