Stríðsástand ríkir á Norðurbrú í Kaupmannahöfn, og reynir lögregla nú að halda aftur af mótmælendum, að því er segir á fréttavef Politiken. Eldar hafa verið kveiktir í rusli sem dreift hefur verið um götur og mótmælendur kasta grjóti í lögreglu sem svarað hefur með táragasi.

Íslenskur námsmaður sem býr á Norðurbrú, Ragnar Þorvarðarson, segist hafa verið á ferðinni á Norðurbrúargötu um hálf sex í kvöld að dönskum tíma, og hafi mótmælendur þá verið að draga ruslatunnur út á götu, dreifa ruslinu og reyna að kveikja í því. Málningu hafi verið slett á götur og flöskum kastað.

Mikill æsingur hafi verið meðal mótmælenda, en lögreglan ekki hvikað. Í hliðargötum hafi mátt sjá marga hettuklædda menn sem virst hafi „tilbúnir í eitthvað meira en friðsamleg mótmæli“. Mikil ölvun og drykkja sé meðal mótmælendanna og séu þeir á öllum aldri.

Fólkið er að mótmæla lokun Ungdómshússins svonefnda í miðborginni, en lögregla réðist til inngöngu í húsið í morgun og fjarlægði þaðan hústökufólk. Tugir hafa verið handteknir í dag og þrír hlotið meiðsl.